पाल्पा । बजार अनुगमनको दायरा फराकिलो नहुदा दुध तथा फेन्सी पसलहरुमा मनोमानी बढेको उपभोक्ताहरुको गुनासो छ ।

स्थानीय तहले कहिलेकाहि मात्र किराना पसलहरुमा अनुगमन गरेपनि दुध डेरी र फेन्सी पसलहरुमा अनुगमन हुन सकेको छैन । जसका कारण मूल्यमा एकरुपता र गुणस्तरीयताको समस्या रहेको उपभोक्ताहरुको गुनासो छ ।

किराना पसलहरुमा कहिलेकाहि अनुगमन गरिएपनि दुध डेरी फेन्सी पसलहरुको अनुगमन नहुदा दुधको गुणस्तरीयता र मूल्यमा एकरुपता देखिदैन भने फेन्सी पसलहरुमा पनि पसल र ग्राहक अनुसार मूल्य कायम गरिने गरिएको छ । यसबारे अनुगमन आवश्यक रहेको उपभोक्ताहरुको गुनासो छ ।

सदरमुकाम तानसेनमा संचालित दुध डेरीहरुमा गरिएको अनुगमनमा ५० प्रतिशत बढी डेरीहरुमा दुधको गुणस्तर कायम नभएको पाइएको छ । स्थानीय प्रशासन र जिल्लास्थित सरोकारवाला निकायले गरेको संयुक्त अनुगमनमा भैसीको दुधको गुणस्तर कम भएको पाइएको खाद्य प्रविधि तथा गुण नियन्त्रण कार्यालय पाल्पाका प्रमुख नरेश श्रेष्ठले बताउनुभयो ।

तानसेनका १० वटा डेरीको अनुगमन गरी नमूना परीक्षण गर्दा ५ वटा डेरीको दुधमा गुणस्तर पुरा नभएको भेटिएको उहाँले बताउनुभयो । सहायक प्रमुख जिल्ला अधिकारी भक्तीसरा रानाले गुणस्तरीय वस्तु तथा सेवा उपभोग गर्न पाउने उपभोक्ताको अधिकार विपरीत कार्य गरेका डेरीहरुलाई सचेत गराई जरिवाना समेत गरिएको बताउनुभयो । उपभोक्ता संरक्षण ऐन २०७५ अन्तरगत सेचत गराई नगद जरिवाना गरिएको उहाँले बताउनुभयो । यस्तै अन्य डेरीहरुमा पनि सरसफाई नगरेको, ब्रान्डिङ नगरी उत्पादित वस्तुको विक्री गर्दै आएको फेला परेपछि मापदण्ड पूरा गर्न सुझाव दिइएको छ । यस्तै प्रकारको अनुगमन र परीक्षण गत जेठ महिनामा पनि गरिएको र मापदण्ड नपुगेका डेरीहरुलाई सचेत गराइएपनि सुधार नभएको रानाले बताउनुभयो ।

पाल्पा । पाल्पाको प्रसिद्ध धार्मिकस्थल रम्भादेवी मन्दिरमा आगामी भदौ १० गते सांस्कृतिक महोत्सव हुने भएको छ । रम्भादेवी मन्दिरको पर्यटन प्रवद्र्धन गर्दै स्थानीय कला, संस्कृति, प्रचलित भेषभूषाको प्रचार प्रसारमा टेवा पु¥याउने उद्देश्यले सहयात्रा नेपालको आयोजनामा रम्भा देवी परिसरमा एक दिने सांस्कृतिक महोत्सव आयोजना हुने भएको हो ।

महोत्सवको उद्देश्य र तयारीबारे आज तानसेनमा आयोजित पत्रकार सम्मेलनमा आयोजक संस्था सहयात्रा नेपालका अध्यक्ष एवम् राष्ट्रिय कलाकार दुर्गा रायमाझीले सरकारले घोषणा गरेको एक सय गन्तव्य मध्येको रम्भादेवी पर्यटकीय स्थलको प्रचार–प्रसार, रैथाने संस्कृति र प्रचलित भेषभूष तथा मौलिक संस्कृतिको पहिचान बढाउन महोत्सव आयोजना गर्न लागिएको जानकारी दिनुभयो । ‘महोत्सवमा रामपुरको बालन, माथगढीको झाम्रे, हुमिनको लाखे, सिलुवाको कौरा, रानीवासको सोरठी र तिवारी आमाको मौलिक तीजसहित स्थानीय कला संस्कृतिहरू प्रस्तुत गरिने आयोजकले जानकारी दिएको छ ।

महोत्सवको सह आयोजक रम्भादेवी पर्यटन विकास प्रतिष्ठान, मुख्य प्रवद्र्धक रम्भा गाउँपालिका, पर्यटन प्रवद्र्धन नेपाल दर्शन, प्रवद्र्धक मातृभूमी सेवा प्रतिष्ठान र कुमकुम ज्वेलर्स न्युरोड काठमाडौं रहेको जानकारी दिइएको छ । महोत्सवमा वरिष्ठ कलाकारहरू नारायण रायमाझी, दुर्गा रायमाझी, इन्द्र जिसी, नारायण लेकाली, अमृत अधिकारी, नविन पौडेल, हुम गैरे, माधव भण्डारी, श्रीदेवी देवकोटा लगायत स्थानीय कलाकारलाई प्राथमिकतामा राखिएको आयोजक समितिका अध्यक्ष रायमाझीले बताउनुभयो । महोत्सवबाट आन्तरिक तथा बाह्य पर्यटनको आकर्षष बढ्ने अपेक्षा रहेको उहाँले बताउनुभयो ।

महोत्सव प्रवेश निःशुल्क रहने भएकोले रम्भादेवीप्रति आस्था राख्ने देश तथा विदेशमा रहने सवैलाई महोत्सवमा सहभागी हुन आयोजकले अनुरोध गरेको छ । परम्परागत रूपमा चल्दै आएको मेला महोत्सवको संरक्षण गर्दै रम्भादेवी क्षेत्रको धार्मिक पर्यटकीय क्षेत्रलाई चलायमान गराउन मेला आयोजना गरिएको आयोजक समितिका अमृत अधिकारीले जानकारी दिनुभयो ।
कार्यक्रममा पत्रकार महासंघ पाल्पाका उपाध्यक्ष भरत शर्माले रम्भादेवीको महत्व र गरिमा बढाउन गरिएको महोत्सव सह्रानीय काम भएको भन्दै महोत्सव प्रचार प्रसार र सम्पन्न गर्न सञ्चारकर्मीको सहयोग र सहकार्य हुने बताउनुभयो ।

पाल्पा । संघीय संसद्को एक समितिको सभापतिमा पाल्पाली सांसद ठाकुरप्रसाद गैरे निर्विरोध निर्वाचित हुनुभएको छ ।

सांसद गैरे राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको सभापतिमा निर्विरोध निर्वाचित हुनुभएको हो । सांसद गैरे पाल्पा निर्वाचन क्षेत्र नं. २ मा नेकपा (एमाले)को तर्फबाट प्रतिनिधिसभा सदस्यमा निर्वाचित हुनुभएको थियो ।

बिहीबार सांसद गैरे समितिको सभापति निर्विरोध निर्वाचित भएको समितिका ज्येष्ठ सदस्यले घोषणा गर्नुभएको हो । निर्वाचित सभापति गैरेले सभामुख देवराज घिमिरेबाट शपथ ग्रहण समेत गर्नुभएको छ ।

ठाकुर गैरेको परिचय

साविक बराङ्दी गाविस वडा नं ८ बेलौतीखरक हालको बगनासकाली गाउँपालिका वडा नं ८ बराङ्दीमा २०२५ साल जेठ ६ गते आमा मोनिकर्ण गैरे र बुवा शोभाकर गैरेको कोखबाट जन्मनुभएका ठाकुर गैरे गत प्रतिनिधिसभा निर्वाचनमा नेकपा एमालेको उम्मेदवारको रुपमा पाल्पा क्षेत्र नं. २ बाट बिजयी हुनुभएको हो ।

४ दाजु भाई र ४ दिदी बहिनी मध्ये गैरे साइलो भाइको रुपमा रहनुभएको छ । गैरेका १ छोरी १ छोरा छन् । सामान्य परिवारमा जन्मिनुभएका गैरेको नेपाली राजनीतिक तथा सामाजिक आन्दोलनमा महत्वपूर्ण भूमिका छ । गैरेले माध्यमिक तहको शिक्षा बेद मावि बराङ्दीबाट पूरा गर्नुभयो । बिद्यालमया स्तरमा रहँदा नेपाल स्काउट, नेपाल रेड्क्रस सोसाइटी, परोपकार संघ नेपाल, चारपाते युवा क्लव, गाउँले युवा क्लव लगायतका संघ संस्थामा रही बिभिन्न रचनात्मक क्रियाकलाप र समाजसेवा मार्फत गैरेले आफ्नो बेग्लै पहिचान बनाउनुभएको थियो । उहाँ बेद माविमै अधययन गर्ने क्रममा गाउँमा रचनात्मक क्रियाकलाप संचालन गर्ने, अनेरास्ववियुमा संगठित भई समाजमा ब्याप्त बिकृति बिसंगतिका बिरुद्ध बिभिन्नि कृयाकलापहरु आन्दोलनहरुमा संलग्न हुने क्रममै राजनीतिक हिसावले संगठित हुनुभएको थियो ।

२०४७ सालमा तत्कालीन नेकपा मालेको संगठित सदस्यता लिएपछि राजनीतिमा निरन्तर क्रियाशील रहनुभएको छ । विद्यालयमै रहँदा गाउँमा परिवर्तनको पक्षमा जागरण पैदा गर्नको लागि ५० रुपियाँको तमसुक, शहीदकी आमा, जस्ता विषयहरुमा नाटकमा अभिनय गर्ने, बिभिन्न साँस्कृतिक अभियान संचालन गर्ने आदि कार्यमा पनि उहाँको भूमिका महत्वपूर्ण थियो ।संगठित जीवनको ३२ वर्ष पछि पहिलो पटक संसदीय उम्मेद्वार बन्नुभएका गैरे बिद्यालय तहबाट नै अनेरास्ववियुमा संगठित भई राजनीतिक परिवर्तन र शैक्षिक आन्दोलनमा समेत क्रियाशील हुनुहुन्थ्यो ।

राजनीतिक क्रियाशीलता
गैरे उच्च शिक्षा अध्ययनको क्रममा त्रिभुवन बहुमुखी क्याम्पसमा रहँदा स्वतन्त्र बिद्यार्थी युनियनमा २०४९ र २०५१ मा स्ववियुको सचिवमा निर्वाचित हुनुभएको थियो । २०५१ सालमा अनेरास्ववियु जिल्ला कमिटि अध्यक्ष, २०५३ सालमा केन्द्रीय कमिटि सदस्य, केन्द्रीय कमिटिको सचिवालय, केन्द्रीय सचिव, केन्द्रीय महासचिव हुँदै २०६३ मा केन्द्रीय कमिटिको अध्यक्षमा निर्वाचित हुनुभएको थियो ।

अनेरास्ववियुको राजनीतिसँगै २०६६ मा भएको नेकपा एमालेको बुटवलको आठौ महाधिवेशन र नवौ महाधिवेशनबाट केन्द्रीय कमिटि सदस्य र दशौं राष्ट्रिय महाधिवेशनबाट पुनःकेन्द्रीय कमिटि भारी मतका साथ बिजयी हुुनुभयो । उहाँ हाल पार्टीको पालिट्ब्युरो सदस्यको रुपमा रहनुभएको छ ।

आन्दोलनमा सक्रियता
२०४६को जनआन्दोलन, २०६२/०६३ को पुजीबादी राजनीतिक क्रान्तिको आन्दोलनमा गैरेको नेतृत्व महत्वपूर्ण छ । सबैका लागि निःशुल्क र समान शिक्षा, गुणस्तरीय शिक्षाको पक्षमा अनेरास्ववियुको नेतृत्वमा भएको आन्दोलन र संयुक्त शैक्षिक आन्दोलनको नेतृत्वको नेतृत्वमा उहाँले अग्रणी भूमिका निर्वाह गर्नुभएको थियो ।

विद्यार्थी आन्दोलन अन्र्तगत बिद्यार्थीको यातायातमा सहुलियत आन्दोलन, कालापानी मार्च, मातृभुमिको सन्देश अभियान, सुस्ता बचाउ अभियान, मेची देखि महाकालीसम्म भारतले गरेको सिमा अतिक्रमणका बिरुद्ध मेची महाकाली राष्टिय अभियानमा गैरेले नेतृत्वदायी भुमिका निर्वाह गर्नुभएको थियो ।

सप्तरीको तिलाठीमा भएको भारतीय हस्तक्षेप र स्थानीय जनताहरु माथि भएको आक्रमणमा घाइते भएकाहरुको रक्षा र त्यस बिरुद्धको आन्दोलनमा गैरेले नेतृत्व दायी भूमिका निर्वाह गर्नुभएको थियो । शाहज्यादा युवराज पारसले गायक प्रविण गुरुङको हत्या गरेपछि हत्यारालाई कारवाहीको माग गर्दै ५ लाख २३ हजार हस्ताक्षर संकलन गरि तत्कालीलन राजा बिरेन्द्रलाई बुझाइएको ऐतिहासिक आन्दोलनको नेतृत्व अनेरास्ववियुको सचिव रहँदा गैरेले नै गर्नुभएको थियो । त्यस्तै पेट्रोलियम पदार्थ, महंगी, भ्रष्टचार बिरोधी आन्दोलनहरुको समय समयमा उहाँको नेतृत्व महत्वपूर्ण छ ।

भारतीय नाकाबन्दी बिरुद्ध देश ब्यापी आन्दोलनको सृजना गर्ने, राष्ट्रिय स्वाधिनताको अभियान संचालन गरि सिंहदरबारदेखि संयुक्त राष्ट्र संघको अफिस पुल्चोकसम्म मानव साङलो प्रर्दशन गर्ने, नाकाबन्दी बिरुद्ध अभियान सञ्चालन गर्नेमा उहाँको भूमिका महत्वपूर्ण छ । एनसेल कर छली प्रकरण बिरुद्धको आन्दोलनको नेतृत्व गरि कर बुझाउनुपर्ने परिस्थितिको निर्माण गर्नेमा गैरेको भूमिका महत्वपूर्ण छ ।