पाल्पा । पाल्पाको सबै भन्दा पुरानो सामाजिक संस्था पाल्पा लायन्स क्लवको आगामी वर्ष २०२४–२०२५ को लागि नयाँ कार्य समिति चयन भएको छ ।
समितिको अध्यक्षमा समिरमान सिं, प्रथम उपाध्यक्षमा हरि रायमाझी, द्वितिय उपाध्यक्षमा अजय बहादुर, तृतीय उपाध्यक्षमा बिनायक महर्जन, सचिवमा तुम्ला बज्राचार्य र कोषाध्यक्षमा रमा पन्त रहनुभएको छ ।
कार्यक्रममा उपस्थित ब्यक्तिहरुलाई कमला शर्माले धन्यवाद ब्यक्त गर्नुभएको थियो ।
पाल्पा । बिद्यालय प्राङ्गणमा लस्करै स्टल राखिएका थिए । स्टलमा बिद्यार्थीहरुले छुट्टा छुट्टै परिकार बिक्रीका लागि राखेका थिए । उनीहरुले बिद्यार्थी, अभिभावक र शिक्षकहरुलाई आफ्नो स्टलमा राखिएका परिकारहरुको ब्याख्या गर्दै आफ्नो स्टलतर्फ आकर्षित गर्दै थिए । अभिभावकहरु पनि आफ्ना छोरा छोरीहरुको उक्त रचनात्मक कार्यहरु हेर्दै खुशी देखिन्थे ।
यो दृश्य तानसेन स्थित पाल्पा आवासीय माध्यमिक बिद्यालयको हो । शुक्रवार बिद्यालयमा फुड फेस्टिवल तथा बिबिध साँस्कृतिक कार्यक्रम सम्पन्न भएको छ ।
कार्यक्रममा बिद्यालयका प्रिन्सिपल गोपाल पिसीले शिक्षालाई संस्कृतिमैत्री र अतिरिक्त क्रियाकलापसँगै जोड्ने अभियान अन्तरगत उक्त कार्यक्रम आयोजना गरिएको बताउनुभयो । उहाँले बिद्यालयले गुणस्तरीय शिक्षासँगै साप्ताहिक रुपमा बिभिन्न रचनात्मक कार्यक्रमहरु संचालन गर्दै आएको र सबै कार्यक्रममा बिद्यार्थीहरुको उत्साहजनक सहभागिता हुने गरेको बताउनुभयो ।
कार्यक्रमका प्रमुख अतिथि तानसेन नगरपालिका वडा नं. ३ का अध्यक्ष बावुलाल शाक्यले जिल्लाको शैक्षिक विकासमा पाल्पा आवासीय माविको भूमिका महत्वपूर्ण रहेको बताउनुभयो । उहाँले यो बिद्यालयमा अध्ययन गरेका बिद्यार्थीहरु अहिले देश बिदेशमा बिभिन्न गौरव गर्न लायक स्थानमा पुगेको बताउनुभयो ।
कार्यक्रममा बिद्यालयका पूर्व बिद्यार्थी एवम् नेपाली सेनाका मेजर सन्जोक कार्की, नेपाल पत्रकार महासंघ पाल्पाका सचिव यज्ञमूर्ति तिमिल्सिनाले यस खालको कार्यक्रमले बिद्यार्थीहरुलाई रचनात्मक बनाउने बताउनुभयो ।
कार्यक्रममा बिद्यार्थीहरुले बिबिध साँस्कृतिक कार्यक्रम प्रस्तुत गरेका थिए । बिद्यार्थी अश्विन गौतमको स्वागत मन्तव्यबाट सुरु भएको कार्यक्रम बिद्यालय संचालक समितिका अध्यक्ष केदारलाल श्रेष्ठको अध्यक्षता र शिक्षकद्वय कमल बस्याल र क्षितिज नेपालको संचालनमा सम्पन्न भएको थियो ।
पाल्पा । बगनासकाली गाउँपालिकाले पालिका भित्र रहेका लामा धामी र झाक्री, जनप्रतिनिधि, स्वास्थ्यकर्मी र पत्रकारहरुसँग नागरिकको स्वास्थ्य प्रवर्धनसम्बन्धी अन्तरक्रिया कार्यक्रम गरेको छ ।
गाउँपालिका भित्रका ४५ जना लामाधामी तथा झाक्रीहरु, स्वास्थ्यकर्मी, जनप्रतिनिधि, पत्रकार लगायतले नागरिकको स्वास्थ्य प्रवर्धनका लागि आआफ्नो तर्फ निर्वाह गर्नुपर्ने भूमिकाबारे कार्यक्रममा छलफल भएको थियो । प्रवक्तासँग पत्रकार कार्यक्रम अन्तरगत आयोजना गरिएको कार्यक्रममा सहभागी लामाधामी झाक्रीहरुलाई आफूहरुकहाँ आउने बिरामीहरुको समय कत्ति पनि नअल्झाई स्वास्थ्य संस्थामा पठाउन अनुरोध गरिएको थियो ।
कार्यक्रममा गाउँपालिकाका स्वास्थ्य शाखा प्रमुख मणिराम खनालले गाउँपालिकाभित्रका नागरिकहरुको स्वास्थ्य अवस्था, स्वास्थ्य शाखा र सम्वन्धित स्वास्थ्य चौकीहरु मार्फत हुँदै आएको सेवाप्रवाहबारे जानकारी गराउनुभयो । कार्यक्रममा लुम्बिनी मेडिकल कलेजकी डा. समता नेपालले अझै पनि मानिसहरु बिरामी भएपछि पछिल्लो चरणमा धामी झाक्रीकोमा जाने प्रचलन कायमै रहेकोले धामी झाक्रीहरुले बिरामीलाई तत्काल अस्पताल पठाउनुपर्ने बताउनुभयो ।
पूर्व स्वास्थ्यकर्मी शालिकराम पहारी, युनाईटेड मिसन अस्पतालका स्वास्थ्यकर्मी चन्द्र भष्मले लामाधामी झाक्रीहरूले बिरामीको समय अल्झाउँदा बिरामी जटिल अवस्थामा पुगिसक्ने भएकोले आफूलाई भेट्न आउने बिरामीलाई तत्काल अस्पताल पठाउन आग्रह गर्नुभयो ।
कार्यक्रममा लामाधामी झाक्रीहरुले पनि आआफ्नो अनुभव सुनाएका थिए । उनीहरुले आफूहरुकहाँ आउने बिरामीलाई सान्त्वना दिँदै अस्पताल वा स्वास्थ्य संस्था पठाउने गरेको बताउनुभयो । चापपानीका तेजलाल तिमिल्सिना, बरांगदीका हरिलाल बस्याल, चापपानीका तीर्थ बस्याल, नायरका देव बहादुर बिश्वकर्मा, पोखराथोककी सुमित्रा बराइली, तारा बहादुर सिंजाली लगायत १७ जना लामाधामीहरुले आआफ्नो अनुभव सुनाएका थिए ।
कार्यक्रममा बगनासकाली गाउँपालिकाका अध्यक्ष सरस्वती चिदी दर्लामीले समुदायमा रही सेवाभावले काम गर्दै आउनुभएका लामाधामीहरुलाई नागरिकको स्वास्थ्य प्रवर्धनका लागि जिम्मेवार बनाउन उक्त कार्यक्रम आयोजना गरिएको बताउनुभयो । उहाँले लामाधामी झाक्री, जनप्रतिनिधि, स्वास्थ्यकर्मी र संचारक्षेत्रको समन्वयमा नागरिकको स्वास्थ्य प्रवर्धन गर्न सहज हुने बताउनुभयो ।
गाउँपालिका उपाध्यक्ष हरिप्रसाद पाठकले यो कार्यक्रमले दीर्घकालसम्म पनि प्रभाव पर्ने बताउनुभयो । समुदाय स्तरमा स्वास्थ्य सेवा प्रवाह नहुँदै वा अस्पताल नबन्दै देखि सेवाभावले काम गर्दै आउनुभएका लामाधामी झाक्रीहरुलाई समय सापेक्ष रुपमा नागरिकको स्वस्थ्य प्रति सचेत र जिम्मेवार रहन आग्रह गर्नुभयो ।
कार्यक्रममा पत्रकारहरु देव पचभैया र नारायण न्यौपानेले कार्यक्रमका सन्दर्भमा सुझाव सल्लाह दिनुभएको थियो ।
गाउँपालिकाका प्रवक्ता टिका बहादुर थापाले गाउँ्रपालिकाले आगामी दिनमा पनि यसप्रकारको कार्यक्रम गर्दै जाने बताउनुभयो । कार्यक्रमकै अवसरमा सहभागी लामाधामी झाक्रीहरुलाई दोसल्ला लगाएर सम्मान गरिएको थियो । कार्यक्रमको सहजीकरण पत्रकार दयाराज न्यौपानेले गर्नुभएको थियो ।
पाल्पा । तानसेनको श्रीनगरमा पर्यटन पूर्वाधार निर्माण भएको छ । श्रीनगर प्रवेश गर्न ५ सय बढी सिंढी चढेर जान सकिने बनाईएको हो ।
तानसेन नगरपालिकाको सहयोगमा वडा नं. १ को कार्यालयले ५ सय ३६ बढी सिंढी निर्माण गरि पर्यटन पूर्वाधार तयार गरेको हो । अब तानसेन वडा नं. १ कार्यालय नजिक (युनाईटेड मिशन अस्पताल) माथिबाट श्रीनगर डाँडामा प्रवेश गर्न सकिने भएको छ । पर्यटकीय नगर तानसेनमा नववर्ष २०८१ मनाउन देश तथा विदेशबाट पर्यटकहरुले भित्रने हुँदा उनीहरुलाई मनोरजनात्मक क्रियाकलाप गराउन पूर्वाधार निर्माणका कार्यलाई निरन्तर रुपमा अगाडी बढाउँदै आएको तानसेन नगरपालिकाका नगर प्रमुख सन्तोषलाल श्रेष्ठले बताउनुभयो । “विगतका वर्षहरुमा पनि यहाँ नयाँ वर्ष मनाउन धेरै आन्तरिक तथा बाह्य पर्यटक भित्रिएका थिए । श्रीनगरमा पूर्वाधार निर्माण गरिएकोले विगतमा भन्दा यस पटक बढी रौनकता थपिनेछ ।” उहाँले भन्नुभयो ।
गर्मीयाममा हिमालको चिसो हावासँगै नाचगानका साथ रमाउन तराई क्षेत्र रूपन्देही, कपिलवस्तु, नवलपरासी क्षेत्रका बासिन्दाहरूका लागि तानसेनको श्रीनगर विशेष क्षेत्र बन्ने गरेको छ । तानसेन नगरपालिका वडा नं. १ का वडाध्यक्ष सुनिल कुमार बस्यालले तानसेन नगरपालिका कार्यालयको ५ लाख र अन्य स्थानीयहरुको सहभागितामा सात लाख रुपैयाँको लागतमा विभिन्न पूर्वाधार निर्माणको कार्य सकिएको बताउनुभयो । श्रीनगर प्रवेश गर्न रंगरोगन गरिएको सिंढी निर्माण गरिएको छ । बीच भागमा प्रतिक्षालय निर्माण गरिएको छ । विभिन्न स्थानमा पर्यटकहरूका लागि चाहिने विश्राम बेन्च निर्माण, चाँद निर्माण तथा सरसफाई र रंगरोगनको कार्य सम्पन्न गरिएको वडाध्यक्ष बस्यालले बताउनुभयो । अब श्रीनगर जाने प्रमुख प्रवेशद्धार यहि पूर्व क्षेत्र हो । यहाँ स्वच्छ खानेपानी, सुविधायुक्त शौचालय, बस्ने शीतल छहारीको व्यवस्थाका् कार्यका लागि पहल गरिरहेका छौं । उहाँले भन्नुभयो ।
तानसेन १ का वडा सदस्य राम प्रसाद भट्टराईले श्रीनगर प्रवेश गर्नमात्र होईन श्रीनगर डाँडाबाट सूर्योदय हेर्न पनि सहज भएको बताउनुभयो । मर्निङ वाक गर्नेहरु सिढीं चढेर माथी श्रीनगर जाने गर्दछन् । यसले शारिरीक व्यायामसँगै स्वस्थ्य जीवनशैली अवलम्बन गर्न पनि टेवा पुगेको छ । उहाँले भन्नुभयो ।
पाल्पा । तानसेन नगरपालिका वडा नं २ मा रहेको महेन्द्र बोधि मा.वि. (एमबिएस स्कूल)ले निजामती कर्मचारी, जनप्रतिनिधि, शिक्षकका छोराछोरीका लागि बिहान ९ बजेदेखि साँझ ५ बजेसम्म विद्यालय खोलेर विविध कार्यक्रम सहितको योजना ल्याएको छ ।
विद्यालयले बिहान नियमित ९ बजे खोलेर १० बजेसम्म विद्यार्थीका लागि रिले रिडिङ, रिले राइटिङ, रिले स्पिकिङको कार्यक्रम ल्याएको हो । त्यस्तै ४ बजेपछि ५ बजेसम्म विद्यार्थी प्रतिभा पहिचानका कार्यक्रम समेत ल्याएको छ ।
विद्यालयले कक्षागत सिट संख्या निर्धारण गरी विद्यार्थीको नेमप्लेट समेत राख्ने भएको छ । अब प्रत्येक कक्षामा ३० जना भन्दा बढी विद्यार्थी भर्ना नलिने विद्यालयले जनाएको छ । आगामी बर्ष विद्यालयले अनुशासन र शान्तिका लागि बौद्ध शिक्षा कार्यक्रम सञ्चालन गर्ने, शुक्रबारलाई बुक फ्रि फ्राइडेको रुपमा विविध कार्यक्रम गर्ने, बालमैत्री वातावरणमा मुस्कान सहितको विद्यालय प्रवेश, संगीत र पिटी सहितको प्रार्थना कार्यक्रम सञ्चालन गर्ने विद्यालयका प्रधानाध्यापक केशव के.सी.ले बताउनु भयो । त्यस्तै नेपालकै पहिलो सामाजिक प्रयोगशालामा सामाजिक विषय सिकाइ सहजीकरण हुने, शिक्षक र विद्यार्थीका लागि शैक्षिक सामग्री निर्माण कक्षको व्यवस्था गरिएको, सबै विद्यार्थीको पोर्टफोलियोमा प्रत्येक हप्ता प्रत्येक विषयको प्रोजेक्टवर्क र विद्यार्थीको प्रतिभालाई रेकर्ड राख्ने व्यवस्था भएको सहायक प्रधानाध्यापक हरिलाल गैरेले बताउनु भयो ।
विद्यालयले कक्षाकोठामै प्रविधिमैत्री शिक्षालाई जोड दिइने, हरेक पर्व र विदाका बेला विविध कार्यक्रम गरी विद्यार्थीको संस्कार र संस्कृतिको जगेर्ना गर्ने खालका कार्यक्रम समावेश गर्दै बिदा कम हुने विद्यालयको रुपमा स्थापित गरिने, पहिले भन्दा नतिजामा सुधार गरेमा पुरस्कृत गरी विद्यार्थीको आफूसँग आफ्नै प्रतिस्पर्धा गराइने, पठन सिपको विकास गर्न लाइब्रेरीको भरपुर उपयोग गरिने, उत्कृष्ट विज्ञान प्रयोगशालामै विज्ञान विषय गर्दै सिक्दै कार्यक्रम लागु गरिने, प्रत्येक कक्षामा बुक कर्नर, सबैभन्दा बढी विद्यालयलाई समय दिने शिक्षक र अभिभावकलाई सम्मान गर्ने योजना समेत विद्यालयले सार्वजनिक गरेको छ ।
विद्यालयले उत्कृष्ट नतिजा दिने शिक्षकलाई कक्षागत रुपमै वार्षिकोत्सवमा सम्मान गरिने, विद्यार्थी भलाईकोष दान पेटिका मार्फत विद्यार्थी प्रतिभा पुरस्कार प्रदान गरिने, अभिभावकसँग सम्पर्क कायम गर्न फोन डायरी कार्यक्रम, टोल भिजिट कार्यक्रम, अभिभावक शिक्षा लगायतका कार्यक्रम समावेश गरी विद्यालयलाई नमूना विद्यालयको रुपमा अगाडि बढाउने विद्यालय व्यवस्थापन समितिका अध्यक्ष सुशीला श्रेष्ठले बताउनु भयो
स्मरण रहोस्, विद्यालयमा चौथो ब्याचले अंग्रेजी माध्यमबाट एस.ई.ई. परीक्षा दिइसकेका छन् ।
पाल्पा । बगनासकाली गाउँपालिका वडा नं. ३ वडा कार्यालयको आर्थिक सहयोग र युवा समन्वय समिति बगनासकाली ३ नारयनमतलेसको आयोजनामा २ दिने कानुनी साक्षरता कार्यक्रम सम्पन्न भएको छ ।
तालिमको समापन कार्यक्रममा बगनासकाली गाउँपालिका अध्यक्ष सरस्वती चिदीले युवाहरुमा कानुनी ज्ञानको आवश्यकता रहेको बताउनुभयो । उहाँले गाउँपालिकाले पनि युवाहरुलाई आवश्यक ज्ञान सीपको बृद्धि गराउँदै अगाडि बढाउने योजना अनुरुप कार्यक्रम गर्दै आएको र वडा स्तरबाट पनि लक्षित वर्ग अन्तरगत यु्वाका लागि महत्वपूर्ण कार्यक्रम संचालन हुँदै आएको बताउनुभयो ।
कार्यक्रममा वडाध्यक्ष एवम् बगनासकाली गाउँपालिकाका प्रवक्ता टिका बहादुर थापाले यसप्रकारको तालिमबाट युवाहरुले कानुनी साक्षरता लिने भएकोले पनि वडाले बिशेष महत्व दिएर बजेट बिनियोजन गरेको बताउनुभयो । उहाँले युवापुस्तामा कानुनी, सामाजिक, राजनीतिक, साँस्कृतिक विषयमा पनि जानकारी आवश्यक रहेको बताउनुभयो । उहाँले वडाले आगामी दिनमा पनि युवाहरुको नेतृत्व विकासका लागि बिभिन्न किसिमका कार्यक्रमहरु संचालन गर्दै जाने बताउनुभयो ।
तालिमको पहिलो दिन पत्रकार तथा मानवअधिकारकर्मी यज्ञमूर्ति तिमिल्सिनाले मानवअधिकार विषयमा सहजीकरण गर्नुभएको थियो । त्यस्तै पत्रकार दयाराज न्यौपानेले युवा र नेतृत्व विकास विषयमा र आर्यभञ्ज्याङ् प्रहरी चौकी प्रमुख हरि प्रसाद अर्यालले समुदायमा हुने घटनाहरुको न्यूनीकरणमा युवाहरुको भूमिका बिषयमा सहजीकरण गर्नुभएको थियो ।
तालिमको दोस्रो दिन अधिवक्ता शान्ति बस्याल र पत्रकार देव पचभैयाले सहजीकरण गर्नुभएको थियो । कार्यक्रम युवा समन्वय समिति नायरनमतलेसका संयोजक डेन्जिङ् रायमाझीको अध्यक्षतामा चलेको थियो ।
पाल्पा । बगनासकाली गाउँपालिका वडा नं. ९ चिलाङ्दी गोपाल्दी मालारानी बुल्ठाकी सडक चैत २५ गतेदेखि बैशाख ३० गतेसम्मका लागि ३५ दिन बन्द हुने भएको छ ।
यो सडक खण्डमा बगनासकाली गाउँपालिका र सडक पुर्वाधार कार्यालय माफर्त पिच गर्ने योजना रहेको छ । बगनासकाली गाउँपालिकाका प्रमुख प्रशासकीय अधिकृत बद्रीनाथ लम्सालद्वारा जारी सूचनामा यो अवधिमा बैकल्पिक बाटोको प्रयोग गर्न अनुरोध गरिएको छ ।
बैकल्पिक बाटोको रुपमा बुल्ठाकी–सहकारी चोक–ढावखोला–नारायणडाँडा तथा देउराली–बराङ्दी–वडा नं. ८ कार्यालय–नारायणडाँडाको बाटो प्रयोग गर्न सकिनेछ ।